13072017paroysiashnarkwtika0011499975962
14/07/2017 - 9:09

Shkatërrohet rrjeti i kokainës nga Bolivia në Europë, pranga bosit shqiptar

Policia greke ka asgjësuar një rrjet ndërkombëtar të trafikut të kokainës që e sillte drogën nga Bolivia dhe e shpërndante nëpër Europë.

Një nga krerët e këtij rrjeti është shtetas shqiptar, i moshës 44 vjeç, që është arrestuar, raportojnë mediat lokale.

Sipas policisë, në pranga janë vënë 22 persona, shtetas të Shqipërisë, Greqisë, Republikës Domenikane, Kolumbisë, Bolivisë, Venezuelës, Rusisë, Gjerogjisë dhe Bullgarisë.

Dosja penale përfshin dhe 14 persona të tjerë, 11 prej të cilëve janë shpallur në kërkim.

Sipas shefit të sigurimit publik të Athinës, gjeneral major Christos Zafeiropulos, janë evidentuar të paktën 229 dërgesa me kokainë. E veçanta e kësaj çështjeje është se droga vinte në Greqi në një mënyrë mjaft të kamufluar. Për mos t’u diktuar, posterat dhe kalendaret që dërgoheshin me postë, lageshin më parë me kokainë në trajtë të lëngët. Ky proces zhvillohej në Bolivi.

Me mbërritjen e kolive në Greqi, ato merreshin dhe përpunoheshin. Ndanin kokainën nga letra dhe e përzienin me substanca të tjera, meqenëse kokaina që vinte nga Bolivia ishte mjaft e pastër. Pastaj e shpërndanin nëpër Europë, duke nxjerrë fitime kolosale.

Rrjeti funksiononte në mënyrë tepër të organizuar dhe kishte dy nëngrupe.

Nëngrupi i parë, që drejtohej nga një shtetas shqiptar i moshës 44 vjeç, kishte për detyrë të gjente dhe të negocionte me furnizuesit e drogës në Bolivi.

Detyra tjetër e grupit ishte të merrte kolitë postare, t’i magazinonte ato si dhe të mbikqyrte procesin e transformimit të drogës së lëngët në pluhur. Specialist për këtë proces ishte një shtetas kolumbian i moshës 62 vjeç, që mbërriti enkas në Greqi, në fillim të korrikut 2017.

Nëngrupi i dytë drejtohej nga një shtetas grek, me moshë 60 vjeç, dhe kishte për detyrë gjetjen e klientëve si dhe menaxhimin e fitimeve.

Pas operacioneve në Athinë, Selanik, Lamia dhe në Kretë, policia ka sekuestruar 53 postera kartoni të lagur me kokainë, pesha e përgjithshme e së cilës ishte 5,3 kliogramë.

Sipas policisë, pas përpunimit, kokaina e përftuar do t’i kalonte të 15 kilogramët.

Leave a Reply

Your email address will not be published. Required fields are marked *

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>